कुवा, धारा र बाटामा रित्ता गाग्री म देख्तछु
गाग्रीभन्दा अझ धेर रित्ता ग्यालेन देख्दछु
रित्तो ग्यालेनको अर्थ रित्ता पेट म देख्दछु
पेट मात्र कहाँ हो र देशै म रिक्त देख्दछु ।

कापीमा योजना धेरै उपलब्धि त रिक्त छ
पाएको जे देखाइन्छन् त्यहाँ त अझ रिक्त छ
बोलीले मात्र के हुन्छ काममा रिक्त देख्तछु
आँखामा जेसुकै छाओस् रित्तो जीवन देख्दछु ।

पोका छन् बल्खुका रित्ता सानेपा अझ रिक्त छ
बुद्धनगरमा दृष्टि लाग्छ पूर्ण कि रिक्त छ

निरीह बाह्य छ सारा रिक्ततामै रमाउँछ
रिक्तमा पूर्णता खोज्न मैले अभ्यस्त बन्नु छ
यद्यपि मेरो यो स्वत्व मभित्रै आज रिक्त छ
सत्य हो मै हराएको मेरो म आज रिक्त छ ।